18 Ağustos 2017 Cuma

İstirahət seçimi

   Qızmar yay günlərindən hər kəsə salamlar. Belə istilərdə yəqin ki, bir çoxunuz həm sərinləmək, həm də tətil fürsətini qaçırmamaq üçün istirahət yerlərinə üz tutmusunuz.

   Tətildə dincəlmək üçün hər kəs özünə görə fərqli məkanlar seçir. Yəni hər kəsin istirahət anlayışı fərqlidir.

  Yay oldumu ağıla ilk gələn dəniz və qızmar qum olur. Bəzilərinin düşüncəsinə görə çimərliyə gedib yanmadınsa yayı yaşamamısan deməkdir. İnsanlar axın-axın dənizin yolunu tuturlar. Yaxşı ki, Xəzərimiz (suları çirklənilmiş olsa da) var. Dənizi, üzməyi sevən insanlarımıza öz qucağını açır.

   Yay fəslində ən çox sevinənlər yəqin ki, il boyu səssiz, kimsəsiz qalan bağ evləri olur :) Ev sahiblərinin dəvətləri ilə gələn qonaqlarla aşıb-daşan bu evlərdə həyət işıqları səhərə qədər yanır. Hər gün kabab qoxusu yüksələn bu həyətlər uşaqların və böyüklərin səs-küyü ilə şənlənir. Bağ evi olanlar çox vaxt tətilini elə burdaca keçirməklə kifayətlənir.
         
   Bəziləri isə (daha çox bağ evi olmayanlar :)) istirahət üçün təbiətin qoynuna verirlər özlərini. Gözəl təbiəti olan regionlarımıza səfər edib maddi imkanı əl verdiyi qədər xüsusu istirahət mərkəzlərində qalırlar.
Rayonda, kənddə qohum əqrəbası olanlar isə tətili daha ucuz və sərfəli başa vururlar. Həm qohumları ziyarət edir, həm də ürəklərincə dincəlirlər. Necə deyərlər həm ziyarət, həm ticarət  :) 

   Maraqlıdır ki, istirahətə və ya tətilə getmək sanki yalnız Bakılılara xas bir adətmiş kimi gəlir insana. Rayon yerində yaşayanlar üçün sanki belə bir  ehtiyac heç yoxdur. Çünki Bakılılar istirahət etmək üçün rayonlara gedirlər. Bəs bu yazıq rayonlular hara getsinlər :) Baxmayaraq ki, rayonda yaşayanlar əslində şəhərlilərə nisbətən il boyunca daha çox işləyir, daha çox yorulurlar, lakin, onların bir çoxu istirahət üçün öz yaşadıqları ərazilərdə qalmağı üstün tuturlar. Bir qismi isə Bakıya gəlib bulvara, alış-veriş mərkəzlərinə və şəhərin digər gəzməli-görməli yerlərinə baş çəkirlər. Məncə bu bir az da maddi məsələ ilə bağlıdır.

   Və bir qisim insanlar da var ki, istirahət üçün başqa ölkələrə üz tuturlar. Xüsusən qardaş Türkiyə bu ölkələr arasında birinci yerdə gəlir.

   Bəs yaxşı doğurdan da  Azərbaycan əhalisinin hamısı istədikləri kimi istirahət edə bilirlərmi?

   Dediyim kimi şükür ki, Xəzərimiz var. Ora üz tutanların az xərclə dincəlmək şansı olur (Təbii ki, bahalı çimərliklər də vardır, lakin yaxşı ki, sadə xalq üçün olan çimərliklər hələ də var)
          
   Açığı heç vaxt dənizdə üzməmişəm. Bəlkə ona görə də dəniz mənim sevib-seçəcəyim istirahət məkanı qəti deyil. Hicablı biri olduğum üçün dənizdə üzmək kimi bir şansım da olmur. Örtülü xanımlar üçün olan xüsusi çimərlik paltarları ilə dənizə girməyi də münasib bilmirəm mən. Bu mənim şəxsi düşüncəmdir. Və bəzən əslində bütün insanlıq üçün yaradılan dənizdən mənim kimi düşünənlərin nəsibsiz qalması haqsızlıq kimi gəlir mənə. Müsəlman bir ölkədə bu mütləq nəzərə alınmalıdır.  Sırf qadınlar üçün bir çimərlik olsa heç də pis olmaz.
PS: Lənkəran çimərliyində buna nisbətən diqqət olunurmuş. Bir nümunə var yəni.

   O ki, qaldı bağ evlərinə əhalinin çox az hissəsi belə bir xoşbəxtliyə malikdir. Nəsildə bir nəfərin bağı varsa ora gedib 1-2 gün dincəlmək bəs edir qohum-əqrabaya.
Rayonda qohumları olmayan və ya olsa da elə yoxmuş kimi olan, yəni qonaqpərvər qohumlardan məhrum olan şəhər sakinləri də var. Tək çarə istirahət məkanlarına üz tutmaq olur ki, bu da ayrı bir dərddir. 

   Çox təəssüf ki, Azərbaycanda gedib qalmaq üçün tikilmiş istirahət evləri o qədər bahadır ki, normal gəlirli bir ailənin qala bilməsi qeyri-mümkündür. Ya il boyu boğazından, üstündən-başından kəsib pul toplamalısan. Ya da girdiyin borcu yenə eyni şəkildə il boyu ödəməlisən.

   Rəbbim elə gözəl bir təbiət verib ki, bizə : dağlı, dərəli, çaylı, meşəli... Amma məncə biz bunu layiqincə qiymətləndirə bilmirik. Hansı yerlər ki, qorunur, gözəlləşdirilir oraların qiyməti yüksəlir. Sadə vətəndaşın belə məkanlara girişi çətinləşir. Kənarda qalmış yerlər isə baxımsızlaşır, çirklənir. 

   Məsələn,  bizdə gedib oturub rahatca piknik edə biləcəyimiz yerlər yox deyiləcək qədər azdır. Kaş ki, dövlət buna da bir əl atsa.

   Qısacası, canım oxucum, tətildə gəzmək üçün, dincəlmək üçün məkanlar Azərbaycanda çoxdur əslində. Amma məhdud gəliri ilə  bunu rahat bir şəkildə həyata keçirəcək insan çox azdır.
   
   Təəssüf ki, bir az maddi vəziyyətlə bağlı olaraq, bir az da işlədiyi müəssisə ilə əlaqədar yayı ilin digər günləri kimi evində keçirənlər də var.

   Siz yayda necə dincəlirsiniz? Dənizdə, bağda, istirahət məkanlarında, yoxsa elə evinizdə? Yazıb bizimlə bölüşsəniz çox şad olarıq.

   Harda olursunuz olun, harda dincəlirsiniz dincəlin. Əsas odur ki, ürəyiniz istədiyi kimi istirahət edin. Hamınıza xoş istirahətlər...



15 Ağustos 2017 Salı

John Green - Eyni ulduzun altında

         
   Nəhayət, mən də uzun bir müddətdən sonra dostusunun birdənəsi Aybənizim sayəsində müasir dövr ədəbiyyatından bir nümunə oxudum - Eyni ulduzun altında.
  
   Kitab haqqında danışarkən gözləri parlayan Aybənizimin  əsəri çox bəyəndiyini anlamışdım. Ona görə böyük bir maraqla başladım oxumağa. 
  
  New York Times Bestseller olan bu kitabın müəllifi  John Greendir.
 
   Əsərin qeyri-adi bir havası var. Mövzusu əslində ağırdır. Amma yazıçı elə bir üslubla anlatır ki, hər şeyi bu ağırlığı hüzünlü gülücüklərlə atlata bilirsən. Axıcı dili sayəsində bir günə belə oxuyub qurtara bilinəcək kitabdır yəni.

   Əsərin baş qəhrəmanı Hazel Qreysin dili ilə danışılır bütün hadisələr. Əslinə baxanda əsərdə romantika var. Amma bu bizim alışdığımız romantikadan, çox- çox fərqlidir. 

   Əsərin qəhrəmanları nə ilıq bir yaz səhərində ətrafında çiçəklərin uçuşduğu böyük bir ağacın altında tanış olurlar, nə bir universitet həyətində toqquşub kitabları yerə tökülərək bir-birini fərq edirlər. 
Nə zərif bədənli, gözəl üzlü, gur saçlı alışdığımız qadın qəhrəmanlarının nümunəsinə bənzər bir təsvir çıxır qarşımıza, nə də enli kürək, sağlam vücudlu, yaraşıqlı kişi qəhrəmanının.

   Onlar ümidsiz, sadəcə bu bəlanı özü kimilərin anlaya biləcəyi həmyaşıdlarının - xərcəng xəstəliyindən əziyyət çəkənlərin kilsədə bir araya gəldiyi  Xərçəng Xəstəsi Uşaqlar Üçün Dəstək Qrupunda görürlər bir-birlərini.

   Hazel 16 yaşında burnuna boru qoşulmuş oksigen balonuyla dolaşmağa məcbur, həyatının son günlərini yaşayan ölüm həqiqəti ilə barışmış gənc bir qızdır. Əlbəttə gözəldir, zərifdir. Lakin sıxıntıların, xəstəliklə gələn əziyyətlərin arasında yazıçı bunu xüsusi olaraq qeyd etməyi, belə bir təsvirə yer verməyi lazımsız bilir sanki.

   Aqust Vaters isə 17 yaşında yenə xərcəng sayəsində bir ayağını itirmiş, protez ayaqla dolaşan gənc bir oğlandır. Hazelin dili ilə anlatıldığı üçün onun nəzərində yaraşıqlı bir oğlan olduğunu müşahidə edirik.

   Onların dost əhatəsi də olduqca azdır. Özləri kimi olan, xəstəlikdən gözlərini itirmiş İsak ortaq dostlarıdır. Çünki onlar xərçəng adlı ayrı bir dünyanın sakinləridirlər sanki. Yəni onların dünyası ayrıdır. Maraqları, sıxıntıları yaşadığımız dünyadakılardan çox fərqlidir.

   Onları bir-birlərinə yaxınlaşdıran da elə həyata və ən əsası xərçəngə olan ortaq baxışlarıdır. Bu gənclər xəstəliyin gətirdiyi sıxıntılara görə sızlanmırlar, özlərini acınacaqlı göstərmirlər, əksinə, bu cür yanaşmadan nifrət edirlər. Öz xəstəliklərinə rişxəndlə, kinayə ilə yanaşırlar. Başqalarının, xüsusilə, hər zaman yanlarında olan ailələrinin onlara görə əziyyət çəkməsinə qəti razı deyillər.

   Və hər ikisini bir şey narahat edir : bu dünyadan köçəndən sonra unudulmaq. Tarixi bir qəhrəman olmasalar da onlar xəstəliklə apardıqları mücadilənin amansızlığını sadəcə özləri və ailələrinin bilməsini haqsızlıq olaraq görürlər.

   Başqa detallarına enib əsər haqqında spoiler vermək istəmirəm.

   Sadəcə onu deyə bilərəm ki, oxumağa dəyər bir kitabdır. Oxuyunca həyatda problem olaraq gördüyünüz hər bir şey bir anda bəsitləşəcək gözlərinizdə. Və sizə bəxş edilmiş sağlamlıq adlı ən böyük neməti görmüş olacaqsınız.

   Bir də xəstəliklə imtahan olunan insanlara ayırdığınız diqqətin nə qədər az olduğunu anlayacaqsınız.  Bu laqeydsizliyinizlə onları ayrı bir dünyada yaşamağa məcbur etdiyinizin fərqinə varacaqsınız.

   Və fədakarlığı öyrənəcəksiniz. Öz zövqlərinizdən, maraqlarınızdan başqası üçün vaz keçməyi, sevdiyinizin üzünü güldürmək üçün həyatınızı ortaya qoymağı, bəzən bunun üçün həyatın axışını dəyişdirməyə çalışmağı belə öyrənmiş olacaqsınız.

   Hər kitab ayrı bir dünyadır həqiqətən də. Oxuduqca səhifələr arasında bu dünyalara yolçuluq edirsən. Bitirincə də yeni bir dünyagörüşü ilə qayıdırsan öz dünyana. Ona görə də nə qədər oxumusansa o qədər çox dünyagörüşünə maliksən. Nə qədər oxuyursansa o qədər yaxşı anlayırsan həyatın sirlərini və o qədər çox tanıyırsan insanlıq aləmini...

   Könül istərdi ki, daha çox oxuyum, daha çox səfər edim bu ayrı dünyalara. Bundan nə qədər çox zövq aldığımı izah edə bilmərəm. Lakin hər kəsin fərqli həyat şərtləri olduğunu qəbul edib, ara-sıra oxuya bildiyimə də şükür etməkdən başqa əldən bir şey gəlmir.

   Bu qədər.  Sevgiylə, oxumaqla qalın inşallah ...

11 Ağustos 2017 Cuma

Çılğın sarışın

        
   Ənənəvi fəsil gözəlləmələrində növbə yayındır.

   Digər mövsümlər yurdumuzun müvəqqəti qonağı ünvanında olsa  da yay buraların sakinidir. Yay daha bizdəndir, daha yaxındır sanki. 

   Çünki yay oldumu evdə-eşikdə kimsə qalmır, qış boyu öz dünyasına çəkilmiş qonum-qonşu, qohum-əqraba hamısı gün üzünə çıxır. Qadınların şirin-şirin söhbəti, kişilərin ağac kölgəsində nərdi, dominosu, uşaqların axşamacan bitməyən gizlənqaçı, ip atlaması, futbolu başlayır...Yay hər kəsi mehribanlaşdırır bir baxıma...

   Payız qızılıdır, qış bəyaz, yaz yaşıldır, yay isə rəngarəngdir, al-əlvandır. Yəni hər rəngdən var yayda...

   Dənizin mavisində, qumsalın qızılısındadır yay, bal kimi qarpızın qırmızısında, ürəkləri sərinlədən dondurmanın bəyazındadır, əncirin, günəbaxanın, qarğıdalının sarısında, bol məhsullu  bostanların yaşılındadır yay...
        
   Yay hər yerdədir,  yay hər şeydədir...
Çünki yay günəşin fəslidir... Onun şüaları ilə nüfuz etmədiyi künc-bucaq qalmır. Aydınlatmadığı, isitmədiyi qəlb qalmır. Bütün buzları əridir yay...

   Yay bütün ilin yorğunluğunu çıxardan çılğın, əyləncəli, gözünün maviliyini dənizdən, saçının sarılığını günəşdən almış sarışın bir gözəldir sanki... Heç bir sözündən incinməyən, zarafatcıl, bir az asi, bir az da dəli-dolu bir gözəl... Səni ələ aldımı heç gözləmədiyin dəliliklərə sürüklənəcəksən...
        
   Bütün ilin acısını ya mavi dənizin sularında yorulmadan üzərək, ya yaşıl meşənin dərinliklərində qorxusuzca gəzərək,  ya da hündür dağlara-təpələrə cəsurca dırmanaraq atacaqsan bu sarışınla...

   Yay asudəliyin, azadlığın, bir az da laqeydliyin fəslidir... Oxuyanların imtahandan sonrakı ləzzəti, işləyənlərin bir illik yorğunluğunun nəticəsidir. Uşaqların divara, ağaca dırmaşaraq dərdikləri meyvələrin, kənddə-kəsəkdə fırlanaraq etdiklərin kəşflərin, qısacası, sərbəstliyin mövsümüdür yay...

   Yay tənha qalmış bağ evlərini canlandıran, parkları dolub-daşıran, çimərliklərə həyat verən, kənddə həyəcanla tətildə doyunca görə biləcəyi nəvəsinin yolunu gözləyən nənə-babaları sevindirən mehriban fəsildir...

   Yayda heç kim tənha deyil, yalnız deyil... Başda dediyimiz kimi yay gəldimi bütün qəlbləri canlandırıb bir-birilə qaynaşdırır. Yeni dostlar, yeni həyəcanlar qazandırır.

   Mənim kimi yayı sevməyənlərdənsinizsə bir az da bu yönləri ilə baxın bu mövsümə... Əslində hər şeyi öz içimizdə həll etdiyimizi görəcəksiniz. Yəni gözəl baxan, gözəl görür doğurdan da. Əslində  hər bir şeyə gözəl gözlə baxsaq həyatımız bambaşqa olar bəlkə də... Ancaq gözəllikləri görə biləcəyiniz bir ömür düşünsənizə.

   Gözəlliklər sizin olsun, həmişə gözəl görün inşallah! Bol-bol sevgilər...

Digər fəsillərlə bağlı yazıları oxumaq istəsəniz sadəcə adına toxunmanız kifayətdir :

Sarı gəlin

Bəyaz mələk

Xınalı sona



8 Ağustos 2017 Salı

Yeni sezon başladımı???


        
   Salam olsun bu yazını oxuyan bütün canlara. Yay tətiliniz yaxşı keçirmi? İstilərlə aranız necədir? :)
   
   Bizi soruşsanız şükür yaxşıyıq. Uzun müddətdi yoxam buralarda. Nə yazı yaza bilirəm, nə də başqa bloqları oxuya. Səbəb və ya səbəblərini tam olaraq bilmirəm amma bir neçə şeyə bağlayıram yaza bilməməyimi.
   
   Tam Ramazan bayramı günü ailəmizdə gözlənilməz çox üzücü bir hadisə yaşandı. Çox xırdalığına gedib təkrar o anları xatırlamaq istəmirəm. Çox şükür sonradan dualarımız və Rəbbimin rəhməti ilə hər şey yoluna düşdü.
   
   Amma bu hadisə ailəcək hamımıza dərs mahiyyətində idi sanki. Bir az dünyadan sıyırdı bizi. Öz-özümüzlə mühasibata sövq etdi. Bir anda dünyada sıxıntı olaraq gördüyümüz şeylər bəsitləşdi gözümüzdə. Gözümüzün önündə, ovcumuzun içindəki xoşbəxtliyi çox uzaqlarda və füzuli şeylərdə axtardığımızı fərq etdirdi. Sən demə, nemət içində üzürmüşük, sıxıntımız, dərdlərimiz bizə lütf edilənlərin yanında bir heçmiş. Və sən demə doğurdan da hər şeyin başı sağlamlıqmış.
   Bunları yaşarkən içimdə yazı yazmaq da bir anda bəsitləşdi gözümdə. Niyə yazıram? Nəyə yazıram? Heç nə yazmaq gəlmədi içimdən. Arada hazır olan bir yazımı yayınladım sadəcə...

   Nə isə ki, yavaş-yavaş üzərimizdən atmağa başlamışıq bu ruh halını.
   Bir də bu il bunu fərq etdim yay mənim fəslim deyilmiş. Nəsə qəribə bir ab - havası var bu mövsümün - insanı tənbəlləşdirən, laqeydləşdirən. Heç bir şey etmək istəmirsən. Yoldaşa bu il tətil verilməsə də ( :(((( ), yenə səhər durub yola salmaq rutinimiz davam etsə də, uşaqların tətildə və bizdən uzaq nənə-babalarının yanında kənddə olmaları, səsin-küyün azalması alışdığımız hərəkətli həyat tərzindən uzaq salıb bizi. Və qəbul edirəm deyəsən bir az  tənbəlləşmişik :)
  
   Vəlhasil tənbəlliyim bloqqer həyatıma da sirayət edib.
   Amma sadəcə yazmağa tənbəlləşmişəm. Xahiş edirəm yalnış anlamayın. Yoxsa qış üçün bişirdiyim mürəbbələr, hazırladığım tutmalar əməllicə qoçaq qız olduğumu isbat edir :)))

  Özümə bir söz verərək yeni sezonu bu yazımla açıq elan edirəm :) Bundan sonra bloquma düzənli bir şəkildə yazı əlavə etməyə çalışacam. Bu yolda məni tək qoymayacağınıza ümid edirəm.  Lütfən, hər zamankı dəstəyinizi əsirgəməyin məndən.

   Bu ərəflərdə  yazılarım yay konseptinə uyğun olacaq. Sizi maraqlı tətil yazıları, ənənəvi bədii fəsil təsviri, bir günlük qaça bildiyimiz səyahət yazıları, içinizi sərinlədəcək şirniyyat və qışa hazırlayacağınız tutma reseptləri, əsər təhlili və daha nələr nələr gözləyir.
Bu da yeni sezonun tanıtımı oldu lap :))

   Qısacası harda dincəlirsiniz dincəlin, əsas odur, bizimlə qalın :)) Hamınızı çox sevirəm!!!